上海佬蟹莊 (Closed)

今年終於有機會試到上海佬既大閘蟹啦，今次就試左個大閘蟹餐，$598/人。前菜既醉雞無骨啖啖肉，酒味香濃； 蟹拑凍既蟹肉份量其多而且蟹肉都勁甜；蒜香小黃瓜好清新爽口；黑魚子燻蛋係流心蛋，燻蛋既香味加埋黑魚子，將一隻普普通通既蛋變得不再平凡。蟹粉文思豆腐羹，豆腐切到好幼細而且好滑，加埋好多蟹肉，蟹肉既甜令成個豆腐羹變得好味。清蒸江蘇太湖大閘蟹，最傳統既方法永遠都係最好！清蒸可以保留到蟹既鮮甜，蟹膏既份量多到令人興奮，而且都幾足料，呢隻蟹都幾靚真心。蟹粉黃金磚，豆腐炸到好香脆，加埋蟹粉蟹肉，雖然呢個好普通，但係食唔停口！蟹粉拌麵，上海麵都幾彈牙，蟹粉沾晒係啲麵度，好滿足！仲有清炒豆苗，食左咁多蟹粉最後食埋個菜中和下都唔錯。蟹粉小籠包，呢個就相對蟹粉味無咁濃但肉汁豐富，同埋如果個皮可以再薄就好了。食完蟹當然要飲薑茶啦！甜品係紫薯薑茶湯圓，薑茶唔會話好辣，紫薯湯圓有皮係好似介乎糯米滋同水晶包既口感，介紫薯蓉係真紫薯，而唔係用紫薯粉，呢個糖水劃上左個完美既句號。