正斗粥麵專家 (景光街)

Open Now

Now Closed

其實跑馬地「正斗粥麵專家」開咗咁耐，肥肥家族經常都有幫襯，去得最少o既小肥只限週末先會同屋企人食粥做午餐，但係每個月都起碼會去一、兩次。由於粥品同點心都好啱口味，每每有人身體不適，又或者係想食得清淡啲時，都會第一時間諗起去「正斗」；尋日媽咪遲咗起身，又唔想煮飯，大肥爸爸好爽快地就提議去食粥，有人主動埋單，當然係要舉腳贊成啦 ！自駕人士喺跑馬地食飯經常都要花好多時間搵位泊車，週日中午十二點前還好，有機會執到啲半小時咪錶位，之後就真係要兜到等運到 。XO仔係家中御用柴可夫，每次都會先喺門口放低父母去餐店霸位同叫定食物，所以到步時都唔會影到菜餚o既全相，故一直都未有寫下食評；今次細佬終於決意放下執著，即使相片唔夠完整，都想同大家推介一下自己最喜愛o既粥店 。「正斗」喺跑馬地核心o既景光街，據悉週末區內o既街坊都好鍾意叫外賣，一來近，二來唔洗同人爭位坐，當日亦是如此，中午時份已經聽見電話忙過不停，廚房攞出黎一袋二袋o既外賣明顯多過堂食o既客人人數 ，真係幾誇張。店內食客唔多，唔洗搭枱，三人更被安排入座較好坐o既卡位，賽馬日喺跑馬地對住隻駿馬食飯，莫非暗藏玄機？！（飯後打牌輸咗兩舊水