燒肉屋 (清風街)

今日同朋友去天后食午餐，行經清風街嘅燒肉屋，被門前一塊寫住「午市-商務二人前」嘅大牌吸引住，上面寫住原價530元嘅午市二人套餐， 而家特價399元，我哋即刻入去試下。 餐廳和風設計，座位闊落舒服，方便同朋友倾偈。午市-商務二人套餐包1個沙律前菜、烤肉、2份88元午市定食、2杯飲品和2個甜品，好抵！ 前菜有泡菜、爽口蓮藕片和海带，清新開胃。前菜和麵豉湯可無限添，麵豉湯香而不咸，好飲。 八爪魚柚子醬醋大大碗沙律前菜，色彩繽紛，八爪魚好鮮美，加上新鲜嘅沙律菜、小蕃茄和脆粒，配上芝士粉和柚子醬醋，份外清爽，非常好食。 燒菠蘿炒牛肉丼牛肉鋪滿成個碗面，仲有幾舊燒菠蘿，燒菠蘿咬落好甜好多汁，同牛肉的肉味好配合，配上飯真是好香好夾。 火焰四色刺身丼有好多刺身鋪在碗上，有四種刺身好吸引，刺身好新鮮好食。 超長日式牛仔骨足料大份，用日式醃製，牛肉骨吊在架上，賣相好靚。我哋將一條牛仔骨剪開，肉眼可以見到雪花，肉質细腻，有油花的肉更嫩，新鮮美味。 套餐仲包埋2個飲品和甜品，我地叫左2罐可樂和2杯芒果雪糕，雪糕也好吃。