六記潮州打冷 (Closed)

入去元朗探朋友，問佢呢度附近有乜好食。佢就話附近有間打冷唔錯，都開咗好多年，於是就同佢去咗試吓。我哋兩個女仔食，本來唔諗住叫太多野。點知睇落餐牌佢樣樣野都唔貴，於是都好貪心買咗四樣嘢，分別有豪仔粥、豪餅、滷水拼盤、同埋炒蟹。先講豪仔粥，裏面啲豪仔出奇地多，加埋啲芹菜香噴噴好好味，一啲都唔會腥，粥底都好甜。另外豪餅都好大塊，熱辣辣應該係啱啱炸起，而對面啲豪仔亦同樣好多。滷水拼盤就反而冇乜特別，味道同出面啲打冷差不多。反而個炒蟹就真係好驚喜，唔使$100啲蟹我哋兩個女仔都食唔晒，味道都算唔錯幾滋味。不過晚飯時間都係得一個阿姐喺度，所以如果要求好嘅服務呢度就難啲，不過佢勝在價錢夠平抵食。我如果下次過開來都會嚟呢度食，聽我個朋友講佢間唔中都嚟，因為夠抵食。