葵 (Closed)

呢間喺尖沙咀新開嘅拉麵店只係開左個幾月，其實應該仲係探索味道階段中，三位香港後生仔堅持自己理念去打造一碗清爽美味嘅淡麗系拉麵，店家主打雞白湯，咁我當然亦係點左碗雞白湯拉麵，先試湯底，好香雞油味但又唔會好油膩感覺亦唔會太濃，屬清淡中帶出雞油香味，而麵條係幼麵，幾香麥同蛋味，但麵條比較易淋放一陣就已經淋，低溫煮雞叉燒比想象中做得好，微微黑椒香味，肉質好嫩滑，而豚叉燒亦唔錯，大塊之餘仲比一般拉麵用叉燒厚好多，叉燒肉味夠而調味同浸嘅時間都掌握得幾好，夠滑又有咬口，半熟玉子又係水準之作，食完麵同三位老板傾左一陣，原來佢哋以前從未接觸過飲食業，今次係大膽去將自己喜歡嘅味道同理念去煮拉麵，希望可以煮一碗清淡雞白湯拉麵比客人，佢哋話希望可以令客人食到一碗連湯都飲晒嘅拉麵，佢哋會好用心去問每位食完麵嘅客人意見再作參考改良，而佢哋都知道麵條仲有改善空間，希望下次嚟嘅時候可以有所改良，總括碗拉麵係ok嘅，最重要係要支持本地創作，幾位後生老板睇得出佢哋都好有心去做好碗拉麵。