鉄人旨花

Open Now

Now Closed

呢晚同人嚟到鉄人旨花，一上到去就已經係間餐廳嘅入口。晌omakase同鐵板燒之中，揀咗鐵板燒嚟試，其中幾樣係由師傅即場晌我哋面前煮架。先嚟嘅係手作前菜，沙律入面有紫生菜、車厘茄、露筍。銀鱈魚表面嘅西京味噌醬味道偏甜討好，肉質就幾香軟多汁。海膽汁煮龍蝦食落彈牙，表面嘅海膽汁就可以提鮮。原本仲跟埋青檸，不過都冇用過呢！之後就係A5日本產和牛，睇住師傅一步一步咁晌我哋面前完成，食落有油香，真係唔錯。師傅建議我哋先食原味，之後先點酸汁、岩鹽同香草醬提味。而碟面仲有唔少菊花花瓣同薄荷葉，原來佢哋除咗係裝飾之外，仲有實際用途，師傅話可以將紫蘇花撕碎再加入去酸汁度蘸嚟食，又或者可以蘸意大利黑醋。嚟到最後一樣鐵板燒食物，就係炒飯。師傅將雞蛋、飯、胡蘿蔔、紫洋蔥同煙肉粒分開炒，之後再炒埋一齊，冇幾耐就炒好。飯炒得粒粒分明，幾惹味。最最後就係雜果柚子啫喱，柚子啫喱下面有西柚、哈密瓜、紅石榴、藍莓，餐後食幾消滯。