古今二 (荃新天地)

Open Now

Now Closed

今日喺個商場行街 留意到顯示牌有呢一間古今二，之前喺觀塘試過都幾好食，今次同朋友再嚟幫襯！呢度位置非常便利，環境日本風，點咗個龍卷風沙律，清酒煮蜆，卷物就要咗個富士山同埋烈火紅唇。龍捲風沙律用咗好多蟹籽,海藻同埋脆片。加咗脆片口感非常豐富，而且佢哋嘅沙律醬汁唔係普通嘅白色沙律醬，而係加配咗調味，有少少辣，味道更開胃清新，份量十足。至於個清酒煮蜆同樣份量十足，味道非常清甜，蜆煮嘅時間啱啱好唔會過熟，淡淡地又有啲海藻同埋菇，配埋蜆嘅甜味，喺咁凍嘅天氣好暖胃！富士山卷就有蟹柳蛋與牛油果同埋脆片，我個人好鐘意食蟹柳同鰻魚，海量嘅蟹柳絲配埋牛油果同鰻魚十分岩我口味，非常之好食亦有唔同嘅口感，我個人覺得加咗脆片簡直係畫龍點睛。烈火紅唇有炸牛肉配芝士，上面就放上士多啤梨再加少少佢哋獨有嘅醬汁。呢個配搭好新穎，我之前都未試過，炸牛肉配芝士原來都幾夾，加埋士多啤梨酸酸甜甜食落令到壽司卷更加濕潤。呢度有嘅卷物，飯同紫菜，食材比例好好，唔會太多飯，但又夠飽。而且卷物每款都有唔同擺法及調味，唔會咁單調，賞心悅目，讚！