金啫の鍋 (Closed)

講起食雞煲，大家心目中都有唔少選擇。為左更好既野食，今次抱住嘗新的精神黎到呢間係旺角譽發廣場新開既店叫金啫之鍋，唔同時段有唔同既價錢，我係5:30-7:30呢段時間，收($188+10%)。 一入到去，店面唔算好大，但絕對係乾淨企理，一埋位職員會問要招牌雞煲定辣雞煲，我地就簡左個招牌雞煲，要左少辣，雞煲份量足夠，而且會根據人數送相應既鮑魚,蟹,或蟶子。我地就要左鮑魚。呢到雞煲做到啫既效果，師父會煮到有8至9成熟之後係你面前加埋芫茜一齊啫。雞煲既香,辣,麻配合芫茜既香味十分合拍，令人食到停唔到口。食緊途中，職員推出一大盤蜆俾我地摸，原來係店家既活動，佢地話每個星期摸最多既人會有機票送。有得食又有得玩幾過癮，之後職員會再幫手加黃酒煮蜆，蜆肉鮮甜冇沙，之後再有牛肉烏冬食，食完烏冬會問食客要豬骨定蕃茄湯繼續打邊爐，而呢到打邊爐係自助既不同的菜和肉放係飲品區旁邊，雖然雪櫃不大，但種類十分多而且新鮮。其實係未打邊爐前已經9成飽，走既時候已經係11成飽，點知重有椰汁官燕送，椰汁夠濃官燕爽口，呢個相信係我係食雞煲既店入面食過最好食既甜品。呢個價錢食到咁多好食既野值得再來。