部屋咖啡室

星期六同朋友嚟旺角行吓，行到攰就搵左呢間樓上Cafe輕鬆下。呢間Cafe有幾多旅遊書同埋遊戲可以玩，幾適合一班朋友黎敘舊。不過肚餓當然醫肚先，佢餐牌選擇都幾多，而且份份都幾吸引。我哋揀咗個自家製手打牛肉漢堡set同埋烤雞蘑菇闊條麵set，嘢飲就揀咗翡翠朱古力碎雪芭同埋八寶美顏花茶，仲加咗一份炸蟹餅小食。好快就上咗個沙律，一見到個沙律已經覺得幾大份，而且感覺好清新，有麵包碎配芝麻醬沙律，酸酸甜甜感覺好醒胃。然後烤雞蘑菇闊條麵賣相好靚，食落烤雞幾嫩滑，配埋蘑菇同忌廉汁闊條麵一齊食味道好夾，而且配埋一條條蔬菜同埋車厘茄食感覺好清新，忌廉汁份量適中，唔會令到成碟闊條麵感覺好水。至於自家製牛肉漢堡set個炸薯角係啱啱炸起，炸得好脆，一咬就係軟林林嘅薯仔，有外脆外軟嘅感覺。個牛肉漢堡一上就已經見到芝士流晒出嚟，感覺好吸引，而且個自家製牛肉漢堡唔會話好散，一咬落去食到肉質好結實，而且牛肉煎得啱啱好，感覺好滿足👍炸蟹餅都係啱啱炸起，入面食到粒粒蟹肉，外皮都夠香脆，而且每粒都幾大粒，小食嘅質素都唔錯。嘢飲方面，八寶美顏花茶比到好大驚喜，入面好足料，有杞子紅棗龍眼肉等等，飲落好清甜，最鍾意佢有淡淡杞子香味