點點心 (Moved) New Location

食點心唔一定要去酒樓既，無理由下下都走去大圍飲夜茶，今次係旺角搵到間點點心，試下值唔值得推介比大家。識食一定要食燒賣，試一間點心既燒賣就可以大體知道食物的質素。除此之外仲叫左牛柏葉，鳳抓排骨飯，雪梨湯水同糯米飯。點點心的上菜效率有點嚇人，坐左20分鐘都有都上唔到一樣點心，如果肚餓真係等到想發脾氣，但阿姐話因為即叫即做，無辦法，咁我都無理由要阿姐難做，唯有好肚餓咁等落去。燒賣幾好食，略咸一點，肉唔會實，而且都有蝦係入邊，最驚果種得一舊肉的燒賣。牛柏葉就好得人驚，好似香口膠咁，平均一舊我可能咬左五分鐘都吞唔落，未食過咁既牛柏葉，奉勸大家唔洗試。鳳抓排骨飯不過不失，同唐記包點既差無幾。米飯水準麻麻，一大籠但D飯又實又爛，真係唔係幾食得落，是但一間酒樓既都好食過佢。最後雪梨甜水唔錯，不過陳皮味略重，睇返你本身喜唔喜歡。總結係點點心點心好參齊，唔係話樣樣OKAY，但某幾種點心又食得下。