越棧越式湯粉專門店 (荷里活廣場) (Closed)

週末商場到處都係人山人海，搵左呢間比較少人等位嘅越南野試下。裝潢有點特色，但環境較逼。餐牌選擇幾多，一般嘅越南野食都有齊。個人鐘意食香茅雞翼，所以叫左一個香茅雞翼湯河，一個生牛肉湯河，配一碗蘿蔔，再加一碟香茅串燒，揀左雞肉同牛肉，最後仲有嘢飲，一杯芒果特飲，一杯椰汁冰。首先上嘅係香茅雞翼湯河，湯頭幾香，飲落清清地有牛味，又唔會好咸，無乜味精感覺。香茅雞翼唔算好入味，正正常常，勝在外皮夠脆，幾香口。之後就係生牛肉湯河，湯底就一樣啦。主牛肉都幾散，食落亦好普通。最後嘅香茅串燒係最好食嘅。雞肉同牛肉都燒得好脆，本身有醃過，所以好入味，附上嘅沙嗲醬好惹味，串燒點埋醬汁後提升一個層次，味道不錯。唯一缺點就係肉都比較細舊，唔算抵食。本身叫左蘿蔔，但之後話賣哂，所以轉咗生菜。本身一坐低已經聽到賣哂檬粉，之後食食下又聽到賣哂肥牛，可能比較夜嘅時間食物嘅選擇就會比較少！最後嘢飲亦係普通，椰汁冰味道不夠濃郁。埋單一人大約90蚊，但整體無咩特別，唯一好食嘅係香茅串燒。