鳴虎 (順昌大廈) (Closed)

鳴虎而家越嚟越多分店 我記得第一次幫襯嘅時候 仲係土瓜灣嘅一間小店 而家已經有六間🍜另外仲有分店係做石燒系列添今次嚟到西環分店 裝修勁舒服 有日式居酒屋嘅感覺 一入嚟已經聞到濃濃嘅香味 望一望Menu 發現仲多咗好多新嘢😍我哋揀咗兩款期間限定share一齊食▫️北海道蟹肉冷麵第一次食呢度嘅冷麵 涼浸浸嘅感覺啱晒夏天🥢面頭已經見到有大量蟹肉同蟹籽 其實喺麵入邊都暗藏咗蟹肉㗎 所以啖啖都有肉同蟹籽 好滋味🦀蟹嘅鮮甜味道 食落去感覺特別清新 另外會配有一小碗胡麻醬 可以加埋落冷麵到食 個人建議其實加少少就OK喇 因為本身嘅鮮味已經好突出▪️黑松露拉麵之前食過蝦同黑蒜油湯底都好正 今次又可以試新嘢☺️一上枱已經聞到香噴噴嘅黑松露味 食落去亦相當濃郁 不過一啲都唔會覺得膩 啱啱好❤️叉燒經過炙燒 油脂滲出來 燒得相當靚仔 口感軟稔 仲有3大塊咁多🐷大讚拉麵嘅麵質 就算食得慢都唔會有影響 保持到彈牙 仲好掛湯添👍🏻配菜仲有紫菜/黑木耳絲同溏心蛋 隻蛋做到半熟程度 有流心 估計係用日本蛋 蛋香味十分濃郁🥚最後 當晚其實都幾繁忙 店員服務態度都十分之好 一直都好有禮貌 好主動協助💕係令人感覺窩心又滿足嘅一餐