Beerliner German Bar & Restaurant (Closed)

提起德國餐廳，腦入面一定即時諗起Beerliner，可惜聽就聽得多，咁耐以黎一直未有機會試。 今晚朋友工作事務好煩心，就陪佢黎大杯酒大塊肉放鬆下。睇餐牌選擇真係好多，咁岩見Chef Combo ($438)有齊我地想食既秘製德國鹹豬手同德式香腸 ，仲有兩杯無酒精雞尾酒，台台都有叫，一於就叫一客啦。落單冇耐就上菜，開頭都擔心會唔脆，但其實係台台都叫，貨如輪轉所以整定左好多都係岩岩出爐。 德國鹹豬手份量十足，店員先俾我地影相打卡，之後就即席幫我地切開幾份。鹹豬手如想像般皮脆肉嫩，醃得好入味又嫩滑，餸酒一流。 幾鐘意配左幾款醬，包括芥末醬同甜甜地既燒烤醬，食落冇咁膩。德式香腸包括自家製墨西哥辣椒芝士腸、自家製得獎冠軍肉腸同香煎紐倫堡腸同，我最鐘意墨西哥辣椒芝士腸，一切開就爆汁，食到辣辣地既芝心好惹味，薯蓉亦好香滑。Combo仲包左兩杯無酒精雞尾酒，Honeymoon味道清新、較重梳打味， Vitamin C雖然係沙冰但飲落似果汁溝乳酸，好岩女仔口味。好傾好坐，輕鬆度過一晚。