六本木日本料理

Open Now

Now Closed

尋晚同好朋友去咗呢間食晚飯。餐廳嘅裝修都幾舒服。裏邊嘅氣氛好好，好有日本居酒屋嘅感覺。我哋點咗雞子、牛舌、鰹魚湯烏冬、炸飯團、清酒煮蜆、香芒蟹籽沙律、香芒軟殼蟹手卷、海老雲丹天婦羅、雞泡魚乾同明太子玉子燒。鰹魚湯烏冬嘅湯底好濃，鰹魚肉大大嚿，湯底熱辣辣用石頭鍋另上，等食客可以自己調教湯嘅份量。個湯好好味，我同朋友梗係唔放過啦。海老雲丹天婦羅咬落去熱辣辣嘅蝦仁比紫菜包住，外邊仲有一層好薄嘅天婦羅皮包住，食落去好有層次感。串燒雞子上邊放咗啲芥辣同柚子，令到食物更加惹味。反而個蒜蓉牛舌油分太多。呢間嘢嘅老闆好熱情，會主動同啲客傾偈，介紹吓啲食物。仲會唱吓歌添，不過嗰晚似乎over口咗，成個場好似變咗K場咁太嘈傾唔到偈。所以我同埋朋友最後只能提早買單走嚕。