鳴虎 (順昌大廈) (Closed)

今日落雨，所以放工都費事周圍去，去咗附近嘅鳴虎食拉麵。附近有好多日本嘅餐廳，但係拉麵就只係得呢間。入到去地方唔算太大，但係座位與座位之間空位好多，絕對唔會頂住隔離枱嘅人食。冷氣都非常足夠，食咁熱嘅拉麵就一流。鳴虎不嬲都出名食拉麵，所以就分別叫咗一碗蝦味噌豬骨湯拉麵，同埋一碗特濃辛口拉麵。首先每個拉麵都會有一塊紫菜，一隻漏心蛋，同埋兩塊叉燒。先講蝦味噌拉麵，湯底非常濃郁，而且喺拉麵上面落左好多櫻花蝦，除咗美觀之外，增加左蝦嘅味道，浸落啲湯到同拉麵一齊食係提高左蝦味嘅層次。之後就係特濃辛口拉麵，佢係餐牌入邊唯一一碗辣嘅拉麵。嚴格來講佢都算頗辣，但係對於食開辣嘅人來講就應該係濕濕碎。佢湯底入邊加咗一啲紅油令到成個湯底都係紅色，除咗好睇啲之外，其實令到個湯底更加有層次。最後就講吓啲叉燒，一夾就爛非常容易入口，好明顯就係煮咗好耐先會做到咁嘅效果。再加埋每一塊都會有啲肥肉，除咗食叉燒嘅肉味之外，仲有脂肪嘅口感。