柴夫人魚館

Open Now

Now Closed

天氣涼涼地，最啱打邊爐，一般火鍋店的湯底都食厭咗，今日同朋友嚟試試豆花魚。開頭以為是烤魚，原來一嚟就係湯汁連鍋上，下面有個gas爐繼續滾。我哋另外點了一份小食紅油海蜇及2杯咸檸七。 紅油海蜇係用粗身的海蜇，配有芫茜，青瓜絲同洋蔥，很爽口很開胃，雖然是紅油但唔算太辣。D魚同豆花一上枱已經熱辣辣可以即食，第一次試打邊爐食豆腐花，好滑好惹味，原來豆腐花可以咸食，而且同辣魚好夾。魚片有好多，幾入味，唔會一夾即碎，鍋內仲有土豆片及大豆芽，全部都係好吸味嘅配菜。食左1/3左右我哋點了幾份配菜:竹笙，粉皮，響鈴，蛋餃，金針菇，蒿荀。特別推介蛋餃，每隻都份量十足，內餡有滿滿的肉，配落微辣湯底真係好好食。粉皮即是滑粉，呢度用上闊身的，食落更有咬口，其餘的蔬菜類都好新鮮。同場見到好多人食煲仔飯，下次要試試。