海 三碗麵

Open Now

Now Closed

呢間麵店好似日本拉麵店咁，餐牌只有幾款湯底湯麵選擇。麵店由店主一個人主理，專注只做三款湯底，相信出品質素一定有返咁上下，所以搵日嚟試下。三款濃湯伊麵分別係海蝦濃湯、胡椒豬骨濃湯同金華火腿煲雞濃湯。海蝦濃湯呈橙色，食落蝦味非常香濃，啖啖蝦嘅鮮味表面有櫻花蝦，令口感更豐富。呢個蝦湯底甚至比好多香港嘅拉麵店更出色金華火腿煲雞濃湯同樣濃郁但唔油膩，金華火腿味同雞味好平衡。胡椒豬骨湯底好重胡椒味，食落辣辣地。豬骨湯唔係日式拉麵嗰種濃厚豬骨濃湯，唔會覺得油膩。感覺比較似住家湯，完全無味精，飲咗好多都唔覺口渴伊麵完全吸收晒濃湯嘅味道，相信係選用伊麵嘅主要原因伊麵煮嘅程度剛好，唔會過份腍，仍然有少少咬口。每份湯麵都係配烤牛肉，本身三成熟嘅牛肉，切片後用火槍燒表面至五成熟，再加上櫻花蝦同蔥。牛肉味濃而且肉質鮮嫩，用火槍烤過後多一份焦香麵店得三張二人枱，所以等候時間比較耐。當日星期六十二點半嚟到，餐廳已滿座，前面得三個人排，所以等咗半個鐘就有位，唔算等得耐，可以接受。聽講經常排長龍，但好多人話排個半鐘都係值得，我試過之後就明白