Video
Read full review
2017-11-20
638 views
臨近年尾，每個月都有不少飯局，食得肚滿腸肥。百樂潮州酒樓之前都食過，今晚有機會黎到榮獲米芝連推介嘅銅鑼灣總店。適逢百樂潮州五十週年，餐廳亦都特別推出左五十週年套餐，有以往嘅招牌菜，亦有啲改良版小菜。講美食之前，先講美酒。即使大家對酒品無咩認識，都一定聽過Johnnie Walker呢個品牌嘅威士忌。當中分為藍、金、黑三個層次，今晚嘅Blue label就屬最高級。美酒佳餚，以往美酒多數都係配以西餐，不過近年不同傳統中菜求變，介紹食客將中菜配以紅酒、白酒、威士忌等。今次中菜配威士忌，係我個人第一次嘗試，確實有意想不到嘅效果。有一班識飲識食嘅朋友，真好。前菜有八小碟，其實一啲都唔少，同外面中菜廳一般小菜大小相若。不少菜式都係精裝手工菜，有啲更係外界少見。生醃鰤魽。新鮮鰤魽係一般餐廳已經買少見少，由於半熟嘅鰤魽先至最鮮甜好食，若處理不當或者貨源有問題，食客進食呢啲半生嘅貝殼類食物可能引伸好多問題。自然地，大多餐廳就索性選擇唔出售呢樣美食。百樂潮州仍然保留傳統，可見對餐廳來貨何其有信心。輕輕灼過嘅鰤魽，帶少許「血水」，爽口鮮甜。香酥韭菜盒，係另一樣少見嘅手工菜。賣相確實精緻，綠色酥皮外層一層疊
適逢百樂潮州五十週年，餐廳亦都特別推出左五十週年套餐，有以往嘅招牌菜，亦有啲改良版小菜。
講美食之前，先講美酒。即使大家對酒品無咩認識，都一定聽過Johnnie Walker呢個品牌嘅威士忌。當中分為藍、金、黑三個層次，今晚嘅Blue label就屬最高級。
美酒佳餚，以往美酒多數都係配以西餐，不過近年不同傳統中菜求變，介紹食客將中菜配以紅酒、白酒、威士忌等。今次中菜配威士忌，係我個人第一次嘗試，確實有意想不到嘅效果。有一班識飲識食嘅朋友，真好。前菜有八小碟，其實一啲都唔少，同外面中菜廳一般小菜大小相若。不少菜式都係精裝手工菜，有啲更係外界少見。
生醃鰤魽。新鮮鰤魽係一般餐廳已經買少見少，由於半熟嘅鰤魽先至最鮮甜好食，若處理不當或者貨源有問題，食客進食呢啲半生嘅貝殼類食物可能引伸好多問題。自然地，大多餐廳就索性選擇唔出售呢樣美食。百樂潮州仍然保留傳統，可見對餐廳來貨何其有信心。輕輕灼過嘅鰤魽，帶少許「血水」，爽口鮮甜。
香酥韭菜盒，係另一樣少見嘅手工菜。賣相確實精緻，綠色酥皮外層一層疊住一層，香脆可口，帶點韮菜香。內餡有肉碎、菜甫等，鹹香味美。
冷盤小菜仲有涼拌魚皮。魚皮外層脆嫩，厚實有質感，吸收晒少少酸嘅醬汁，十分開胃。
完成八小碟之後，就到個人最期待嘅潮州招牌菜 - 滷水拼盤。呢個滷水拼盤份量甚大，令人驚喜，單單係鵝肉已經足夠一圍十二人，每人食三數片。豬耳凍爽脆，帶點膠質，口感更佳，鵝腸食落更係索索聲。豆腐同雞蛋始終係我從小最愛，兩款食物吸收晒滷水汁嘅精華，香滑入味。
各種滷水配上Whisky on rock，有其獨特嘅化學作用。口感順滑，較為重口味嘅滷水，亦都中和左威士忌嘅辛辣感。
滷水拼盤已經驚喜萬分，但跟住上黎嘅荷包豬肚翅，更加令全枱大小老幼為之讚嘆。洗豬肚過程何其艱辛，再將魚翅塞滿新鮮豬肚內，慢慢熬湯，少啲心思都唔得。魚翅分量足足夠每人分到兩至三両，雖然唔想鼓勵大家食魚翅，但味道確實係無可否認的好。
飲一啖微辣嘅胡椒豬肚湯，再嚐一口威士忌，豬肚翅嘅膠質唔再漿口，湯頭更順滑，又能提鮮。兩者齊下，飲完後大大驅寒，身體微微發熱，一大班人氣氛更熱鬧更喜慶。菊花石榴雞，原來都係潮州特色名菜。外表精緻，的確似石榴，雞肉餡肉嫩多汁。
百樂薑米鴿，烤得香脆嘅乳鴿內裡釀滿薑汁飯，薑味略嫌可以更濃，不過連埋乳鴿肉食仍然鹹香味十足。
潮式金莎大花蝦，亦即平時嘅黃金蝦。邪惡至極嘅油炸食品，充滿鹹蛋香，蝦殼卜卜脆。
食左咁多肉類海鮮類，都要食返啲蔬菜。松鶴延年，名字改得好聽，若果老人家擺壽宴應該十分歡喜。菠菜芡汁意想不到嘅清甜，令蔬菜入味之餘又唔會太濃味。
來到重點之一嘅甜品，每人一碗蛋白芋泥。以前食過百樂嘅芋泥，香滑得黎，芋頭味濃郁，令人回味無窮。芋泥仍舊無得彈，蛋白今次就有點過老。
滿地黃金，粒粒小金元寶，猶如新年過節一樣。油炸食品唔太油膩，內裡嘅花生餡香口，煙韌有口感。
最後再配上一杯功夫茶，清醇甘香，正式完結呢一餐傳統潮州晚宴。
Post
