金源冰室

Open Now

Now Closed

坪洲一日遊，先嚟呢度食早餐。時間尚早所以仲有幾張枱，老闆話每張枱只可以坐兩個人，我哋四個人就分開咗兩張枱。得老闆一人包辦晒所有工作，都要等咗一陣老闆先有時間過嚟幫我哋落單。星期日同埋假期係冇早餐套餐，所以要散嗌，當然點左呢度出名嘅炒通。見老闆一個人做到踢晒腳，觀察到呢度嘅街坊都會好體諒，好多時會自己幫下手，去廚房度同佢點菜，又會自己走去counter嗰度攞煮好嘅食物。見到另外一行五人嘅遊客，老闆都係同佢哋講一台只可以坐人，佢哋就感覺到有啲奇怪，之後老闆又忙自己嘅嘢，佢哋擾攘咗一陣想落單嘅時候，老闆預先聲明，上菜起碼要等四個字，嗰班人見要等咁耐所以就離開咗撈⋯⋯ 似乎老闆佢有佢自己嘅原則，唔好諗住嚟到期望一般餐廳嘅服務水準⋯⋯ 見老闆喺廚房炒野啲鑊氣冚冚聲，見到好大火，個炒通真係好夠鑊氣，味道都唔錯，用嘅豉油都唔會好鹹，好有豉油味，足料，有牙菜、洋蔥、雜菜，不過就幾油，通粉亦都幾林，公司炒通有腸仔、火腿、牛肉，雞扒亦都好大塊，幾豐富，朋友食嘅沙嗲牛肉丁，沙嗲夠濃味，牛肉質素亦都好好，奶茶又香又滑，食得都幾滿足，不過叫做試逐個就算啦⋯⋯ 個廁所就麻麻哋啦，經過仲見到有啲地方都幾污糟⋯⋯