炙・宴 (形點 I)

Open Now

Now Closed

又係煮到好攰諗唔到煮咩叫外賣嘅日子。老公去咗呢間到買，又估唔到喎，商場日式餐廳，吉野家咁嘅價錢咋，仲送埋沙律同麵豉湯，成個定食都係六十幾至百幾有交易，呢個疫情真係搞到民不聊生（下刪一千字）佢哋有個外賣餐牌，同埋本身堂食嘅menu，兩個menu其實都一樣可以叫外賣，堂食嘅menu仲另外有85折，計落差唔多，所以唔好比外賣個餐牌牽引著你想食咩（笑）Aburi 最出名係佢哋嘅豬，我都好想試，但老公就唔知點解買咗鰻魚飯同三文魚親子飯，哈哈，好啦，我都鍾意食嘅，唔怪佢啦。沙律菜keep到爽脆嘅，外賣食到新鮮嘅沙律菜都幾驚喜。蒲燒鰻魚好食，唔腥，半條咁上下份量，我覺得都OK對得住個價位。日本米一粒粒咁，好好味！火炙三文魚親子，三文魚個皮係火炙過，肉就冇乜燒過，可以滿足你想有小小炭燒味但又有食魚生嘅口感。呢個都ok嘅，但係外賣到返屋企，魚生痴住咗所以夾起嗰陣少少散，當然係冇咗堂食嗰種新鮮感。可能好快就有返堂食，又或者真係要全世界有健康碼先可以堂食都未定，但如果未來有機會嘅話，我會試下堂食呢間Aburi EN，總括而言都幾高質。