616牛肉火鍋專門店 (三陂坊) (Moved) New Location

係寒天之下，有一班三五好牛知己，聚埋一齊去食牛，真係人生幾何。以前多數上深圳食潮牛，但最近幾個月都無再上去。好難得係香港搵到一間食牛不同部位既專門店，當然要去試下啦。打邊爐個湯底當然係重中之重啦。附近有人叫咗個花甲湯底，睇落都好多花甲，好足料。不過我地就叫咗最基本果個湯底--「理想點"鮮"」，純粹有牛腩、蘿白。但個湯底應該都有牛骨去熬製，所以飲落去又清又甜，又唔會口渴。加上中意食有味菜既我，皇帝菜係必點之選。我地食咗幾款牛，包括：滑尾龍、吊龍伴、脖仁、澳洲和牛-內裙肉、手打牛筋丸。如果以價錢黎講，牛既質素絕對係物超所值。最重要既係，桌面上有張圖講埋俾你知，每款要淥幾多秒，包唔會過火。當中，最好食最有牛味既，係吊龍伴。 好食過澳牛！牛筋丸都唔錯。打邊爐唔少得既，當然係啤酒。因為第一次黎唔知訂，下次會試下佢既手工啤，都好多人叫黎飲。