魚翅城酒家 (Closed)

呢晚之前我同朋友去行花市，拎住好多野，然後等我男友放工，我地就去左食飯啦~ 本來我話去鴻星架，不過佢大少爺竟係無訂位，大安旨意諗住一定有位，最後都係無位啦，就去左魚翅城食啦。上年同朋友黎食個陣一個二人餐都係$500攪掂，今年要$1000啦，真係肉赤。不過一年都係食一餐即，我諗我值得佢用咁既錢請我啦。我地叫左足3兩既魚翅(唔係老麥既包呀!)、煎鵝肝、鮑汁灼菜芯、xo醬粒粒炒魚唇、蛋白海鮮炒飯，再加一個甜品添!個魚翅真係多到用筷子夾架，而且個高湯又夠熱。鵝肝又軟又脆，食得我超開心又滿足。菜加粒粒魚唇再加個炒飯食得我好飽架，佢個餐真係好足料，幾時食都好滿足。因為飽既關係我地都要抖左一陣先可以食甜品，而且侍應姐姐話佢地每晚夜市都會做兩桶新鮮撞起既豆腐花，我地食完個陣(大概8:30左右)，佢地剛剛倒左之前個桶，所以要我地等多一陣。我鐘意黎魚翅城就係最鐘意佢地d服務態度，佢地知我鐘意食佢地既豆腐花，仲問我想食多幾多碗，佢話我想食幾多都得架。我知你可以話呢d野都唔值錢，佢梗係俾你任食啦，不過佢亦都有權只係俾你食一碗架咋~