花宵 (Closed)

Suntory，三得利啤酒，食串燒就梗係要嚟番杯日本啤酒爽皮一下，揀選咗三得利生啤酒，口感輕快淡雅，餘韻充分表現到啤酒花嘅芳香。日本蕃茄沙律，日本蕃茄新鮮爽甜，份外多汁，沙律汁甜中帶酸，同日本蕃茄嘅甜度非常配襯。赤貝壽司，赤貝新鮮，外表呈橙紅色而帶光澤，肉質爽厚脆嫩，鮮味十足，蝶切令口感爽脆之餘亦更見層次。油甘魚壽司，油甘魚肉質軟身，入口厚實滑嫩，魚肉細緻甘甜，鮮味較重，顏色偏深，好明顯用上咗新鮮嘅貨式。火炙左口魚裙邊壽司，嚟到我至愛嘅火炙左口魚裙邊，火炙後裙邊嘅脂肪被盡數迫出，口感非常豐腴。雞翼，廚師將雞翼嘅外皮燒得相當香脆，配合埋嫩滑嘅雞肉，送酒一流。厚切牛舌串，牛舌厚切，口感份外豐厚，牛味濃重，牛嘅酥香同檸檬汁相當配襯。焦糖菠蘿，呢度嘅焦糖菠蘿真係令人十分驚喜，佢做到好似有層拔絲喺面咁樣，菠蘿外層燒得微微焦脆，拔絲焦糖嘅甜味同清甜嘅菠蘿相輔相成，讚。