元朗燒賣皇后妙舒 (Closed)

結婚前住上水成日落元朗食燒賣皇后，搬左沙田之後少去好多，知道灣仔開左分店，所以之前去書展再去幫襯下啦～燒賣皇后除左招牌香菇豬肉燒賣好食之外，佢地既醬（香辣、咖哩、沙嗲）都好好食。魚蛋、燒賣孖寶 （香辣）招牌香菇豬肉燒賣既香菇有粒粒碎菇，而且好足料，而白魚蛋好彈牙，冇腥味，我就加左皇后香辣油，香辣油一定唔係BB辣，但係個辣真係好吸引，令你不停追食但又要飲水😂😂。炸魚蛋、燒賣孖寶（沙嗲）另外叫多多份炸既，雖然炸左但都有香菇味，炸左既燒賣不會太乾，裏面仍然軟，沙嗲醬唔會好辣。咖喱五寶有魷魚、牛柏葉、豬皮、魚蛋、蘿蔔，咖哩濃同埋都有辣度，牛柏葉、豬皮吸哂咖哩汁好惹味，魷魚又有咬口，最正蘿蔔勁淋冇渣。瑞士雞髀都好大隻又入味，雞肉唔鞋肉。皇后碗仔翅都好足料，有黑木耳、粉絲、冬菇、肉絲，不會太杰變左一patpat，又不會太稀變水狀。我仲買埋皇后香辣油返屋企。