餃掂手工餃子雲吞專門店

知道香港開咗幾多餃子專門店,今次黎灣仔試吓呢間嘅餃子係點樣。我見到餐牌入面有幾多唔同款式嘅餃子，配搭有啲都幾新穎同吸引。例如我叫咗至尊松茸豬肉餃子，由於唔想食煎餃子咁熱氣，揀咗湯餃子，配狀元九鼎湯湯底，松茸餃子飽滿，入面有白松露，都有黑松露，湯餃子清清地，點松茸醬會釣到豬肉同松茸嘅鮮味，而且醬料本身鹹鹹地，亦帶少少乾瑤柱味，點餃子食幾好食。個狀元九鼎湯餐牌寫咗用粉葛，鯽魚，鯪魚等材料煲成，見到個湯好濃，但係唔油膩，飲落都清清地，唔會太鹹，可以配餃子食，連埋湯一齊飲好滿足。兩個人食，仲叫咗一碟雙拼餃子，揀咗雲耳椰菜豬肉餃同埋元貝豬肉餃，雲耳椰菜切成絲，包埋豬肉做餡料，有菜有肉幾健康。元貝餃子就乾瑤柱絲撈埋豬肉入面，食落鹹鹹地，亦都食到瑤柱鮮味。個人比較鍾意食餃子，覺得呢間鋪頭餃子味道都唔錯，餡料都夠多，下次會再試一下其他款式。