金山粥店

Open Now

Now Closed

目前為止，本人食過最好味嘅粥舖。朋友介紹下第一次幫襯，食了一碗白粥和一碟細蝦米腸。原本期望不高，因為現在粥舖多數用米粉溝米煲粥，樣樣嘢都越來越求其，卻不料這裏有驚喜。我喜歡食粥，而逢胃口不佳、食慾不振，更是只想食粥。去粥舖我食白粥便知水準如何，呢間白粥吃得出有大粒開花的米，有濃濃的米香，我不敢肯定冇落米粉，但可以肯定，即使有落，也絕對係好少，至少大幅少過其他粥舖。白粥10蚊，比中環福滿源貴1蚊。福滿源的白粥也是一流水準，綿滑有白果的清香。相比之下，金山的白粥米香更勝一籌，食得出係靚米煲的。一大碗白粥份量十足。蝦米腸的蝦米有香味，熱辣辣新鮮出爐的味道。粉皮柔軟，超多白芝麻，咬落口特別食得出一粒粒芝麻。想問老闆，芝麻係唔係唔洗錢。但嫌老闆豉油淋得太多，下次會要少豉油。另外見炸一腸、炸兩腸都好吸引，老闆手起刀落只聽到索索聲脆卜卜。下次再試有味粥和炸兩。本人不常寫食評，這次寫咁多，係因為香港趕絕細舖的大勢所趨之下，真材實料、實實在在的粥舖絕無僅有，簡直頻臨滅絕。希望呢間西貢粥舖可以長長久久。