52C Medium Rare (Closed)

丫姨約我放工去佐敦陪佢去食dinner。四周逛就發現咗呢間門面比較光鮮潔白企理嘅餐廳, 原來係食石燒牛, 啱哂天氣凍試下, 順便暖下身。餐廳分上下兩層, 地方潔淨企理, 門口位置設自助售賣機, 全日無加一服務費。主打石燒牛選自400日美國殼飼牛. 供應數款不同部位選擇, 另有少量豚肉、雞肉, 而每款肉分別有180g、250g同埋320g, 滿足胃口大嘅食客。我地點咗兩款唔同部位嘅石燒牛set各180g, 套餐包括了餐湯、沙律、白飯。餐湯為羅宋湯, 味道濃郁又足料。石燒板滋滋聲熱辣辣上檯, 180g有掌心般size大, 只有牛表面熟, 內裡依然keep成嫩紅全生, 可以影陣相打卡都唔怕牛會太快熟透。 【牛肩肉套餐180g 】HK$118 牛肩肉位於牛嘅胛部, 前腿上部, 含優質蛋白, 脂肪含量低, 口感軟嫩適中, 中間位肩位相連一條筋有d咬口, 配埋香草牛油增加香濃味道。 【封門柳套餐 180g】HK$158封門柳極少脂肪, 纖維幼細, 切開可以見到紋理清晰, 肉質較腍, 咀嚼後唔會有渣, 肉味濃。套餐不包括飲品, 需要額外order。