初遇

Open Now

Now Closed

難得今晚有位即入就試一次呢間，晚餐冇套餐，單點冇嘢飲，價位算正常（但心中暗暗地覺得偏貴少少）份量正常，唔係特別細，咁我覺得都ok嘅。紅燒牛肉麵，個湯底唔錯，係少左啲紅燒嗰種微微辣嘅感覺，但唔過鹹，都足以令我飲曬個湯。撘左兩條白菜，如果可以比少少紅蘿蔔可能會更加有台式風味。牛肉三大舊，煮得好入味好淋，呢個我比滿分👍啲麵就…真係淋左啲，一夾即散。我都冇expect係刀削麵，但都唔洗咁淋😅扣返啲分，整體比個合格啦。台灣腸肉燥飯，台灣腸份量不少，仲比左一堆生蒜片，夾住食真係唔錯唔錯。附半隻醣心蛋，幾有誠意！飯係珍珠米，煮得剛好，係幾開胃。本身個飯有啲菜脯，枱面都有一盒可自己加，幾正。唯獨肉燥份量真係偏少丫…我諗大概有半個飯要預咗食白飯🥲台式小食選擇眾多，點左個甜不辣同炸魷魚鬚，兩個都唔錯！甜不辣煙煙韌韌！炸魷魚鬚周圍都絕左種，先唔理佢係咪台式小食，總之因為太懷念所以想食🤣整體嚟講，好食嘅，係有美中不足嘅地方，搣唔甩嗰種港式台灣料理陣味。但如果我突然好想食台灣嘢，我都會諗起呢度嘅。