大山日本料理

Open Now

Now Closed

兩口子剛行完家樂坊，望到對面大廈二樓有間食日本嘢嘅舖頭，就上去撐抬腳。餐廳內部裝飾及佈置，好有地道居酒屋風味，無論卡位或散枱的座位都闊落，令人坐得舒適。我倆今日都唔食生冷嘢，叫咗三款熟食。 牛油果軟殼蟹卷物， 其中牛油果好幼滑，軟殼蟹炸得鬆化，加上珍珠米飯鬆軟，一軟一硬，口感豐富，頗為開胃。牛肉壽喜燒係由簡單材料牛肉、鮮冬菇、豆腐、金菇、蔬菜組成，配合甜味十足的湯底襯托下，牛肉顯得格外鮮嫩香滑，味美香甜，牛肉控必點。燒魷魚筒係熱門推介，本身魷魚夠新鮮，調味好正，燒完後更香，入口爆發鮮甜，幼嫩冇渣，直接滑入你的食道。豉油味醬汁非常夾配，上面灑少少芝麻更突顯香味，令人再三回味。不得不提，侍應聲線甜美，招呼周到，令人留下好印象。