香港寧波同鄉會

Open Now

Now Closed

　　成日都聽到人讚呢間「寧波旅港同鄉會」，今次終於搵到人同我去食。各人都推介「鹹蛋黃炒蟹」，但我比較鐘意食蝦，貪佢多肉容易食，「鹹蛋黃炒蝦」果然正(圖)，味濃o既鹹蛋黃同味淡蝦出奇地夾，唔會好似想像中鹹，反而鹹蛋黃香氣久久不散，不過真係幾滯，一隻起兩隻止，少食多滋味。　　將D 鱔切絲，再炸到脆卜卜，成條蟲咁，再加一個甜甜地o既蜜糖汁，就成為「蜜味脆鱔」，咬落脆卜卜，唔講都唔知係鱔o黎，係頭盤不錯的選擇。另一個頭盤「三寶烤夫」亦唔錯，烤夫好似係麵筋咁上下o既o野，煮o既時候索晒D 汁，大家都想像到點入味法。　　「沙窩雲吞雞」係每檯必叫o既菜式，味道唔太特出，但大大窩咁，係大伙兒o既必然選擇。而「擔擔麵」又出奇地好食，濃濃o既湯底，在座有人認為頗辣，但我覺得一般，佢勝在辣之餘仲可以食到濃烈o既麻醬味，加上麵條雖然被杰杰地o既麵底中浸住，但入口唔會一「pat pat」，依然有咬口，值得一試。　　可惜是晚太夜，乜甜品都無晒，加上「休漁期」，食唔到炸鳳尾魚，一於下次去過……大家去之前一定要訂位，事關星期四夜晚都好鬼多人。