Mue Mue

Open Now

Now Closed

美麗華商場多咗啲新餐廳，喺中庭上到三樓再轉扶手電梯會搵到兩間裝修非常有特色嘅餐廳，我地今日先試咗泰菜Mue Mue環境比一般泰國餐廳靚，好啱三五知己聚會。今晚我地叫咗串燒、豆腐、冬蔭功湯、麥片蝦同菠蘿炒飯share，最尾唔少得食埋個芒果糯米飯，好滿足！呢度串燒有豬、牛、雞三款選擇，見到隔離枱揀咗牛好似幾靚咁，好在冇跟錯隊！肉嫩多汁，刷新咗我地對沙爹牛一定乾争爭嘅印象～脆皮豆腐用咗好多辣椒做伴碟但其實唔太辣，加上炸蒜仲好惹味添！冬陰功就相對偏濃偏辣，食開辣嘅一定超鍾意，我地叫咗椰青同杯紅豆冰都相當解辣。咁多菜式我地最欣賞個金沙麥片蝦，中式煮法但又冇平時中菜嘅油膩感，加上蝦球又大又彈牙，推介！菠蘿炒飯有好濃薑黃味，加上新鮮菠蘿粒，同平時食開嘅又係另一番風味。芒果糯米飯份量幾大，有兩球雪糕，飯粒煙韌。