鮨石 (Closed)

星期日同老公終於去到尖沙咀鮨石食Omakase啦。神石$1680+1，用上高級既食材，配多元化的烹調方式，呈現與別不同既廚師發辦。無花果清甜、鯖魚鮮甜肥美，水雲清清地。日本蠔蒸左兩分鐘，食得出好新鮮。油坊主屬於石斑，脂肪超40%既就叫油坊主，口感偏爽個邊。鰹魚用左杜草煙燻，令到魚皮邊變脆左，好特別。勢子蟹有外籽同內籽，而且同蟹肉已經撈埋一齊，好高級。用蒸既方法烹調真鯛，鋪左由五毛青(即係日本白蘿蔔)、甘筍、昆布整成既野，令到味道豐富左，食到腩位同背位，好食。北海道帶子鋪滿烏魚子，食落好似鹹蛋黃甘，下面有冬瓜，個湯仲可以飲添。目光魚以一夜干整成，好鮮又無骨，好味。伊豆半島金目鯛壽司壽司已經搽左芥末，非常肥美。黑北寄壽司爽口又鮮美。拖羅壽司加左海藻鹽，鹹鹹地，拖羅油脂十足。醬油漬赤身壽司用左醬油，味道鹹香左。極上鰤魚壽司真係做到入口即溶，正。喜知次壽司加左柚子，變得清爽又有少少甜甜地。海膽手卷來自北海道既海膽，非常濃郁，十分鮮甜肥美，超正。薩摩雞湯雞好滑，雞湯清甜好飲。法式焦糖燉蛋配熊本縣士多啤梨焦糖燉蛋好濃雞蛋味，夠滑軟身，甜度岩岩好，美味可口。