銀座日本料理鉄板焼 (Closed)

啱啱琴晚喺WA Theatre Restaurant食完一頓不太滿足嘅日本晚餐，今日喺K11 Musea，唔覺意嚟咗呢度試吓佢嘅午市套餐，一連寫咗兩個日本餐review。因為Walk in所以張枱要限時交還，反正都係諗住輕食快閃，所以都冇問題。餐廳環境簡約舒適，坐喺窗邊有無敵海景，藍天碧海令人心曠神怡。兩個人都唔係太肚餓，見套餐都好似好豐富，只係點左一個$750澳洲和牛薄燒鐵板餐share，但係話晒有兩個人，所以喺a la carte 揀多幾款小吃，再加多一細支sake，咁就好睇啲。食物方面，無論質素味道和份量，都有返咁上下水準，個套餐兩個人食勉強都幾夠。澳洲和牛雖然話係薄切，但係薄得來又有啲厚感，唔會薄到風都吹得起嗰隻。大蝦好靚，好有蝦味，蝦頭都𡁻埋。銀雪魚煎得剛好。天婦羅炸得唔錯，分量十足。雖然燒銀杏都幾貴，要成$200，不過份量OK，又熱又香，粒粒都好容易拉出嚟。炒飯炒得粒粒乾身香噴噴，不過就有啲奇怪，炒飯嚟先過和牛鐵板，係唯一嘅美中不足。埋單有八五折優惠，再用埋K Dollar，都幾開心。服務方面亦都冇乜問題，經理Paul好細心，好attentive。下次返嚟，會spend多啲