韓川

Open Now

Now Closed

最近食火鍋較多，好耐無食韓國野，今次同友人聚餐，特別搵咗間位於旺角女人街嘅韓式餐廳，方便就腳嘛。呢間餐廳走型格的工業風路線，門口處有L型的大梳化，裡面有多座4人檯，空間尚算寬敞。先來一份韓式炸餃拼盤作前菜小食，拼盤有泡菜餃2隻、粉絲餃2隻及雞皮餃2隻，皮薄餡多，始終泡菜餡最有韓式味道。另外真露焗蜆一擺上檯都幾香氣撲鼻，好濃郁的蒜蓉味，加上少少酒香，蜆的份量都算多且新鮮，不過最好食都係鋪在底層索晒汁的粉絲。至於韓式芝士溫泉蛋豚肉蓋飯真係超邪惡，因為面層芝士勁多，連同半熟溫泉蛋融合一齊，加上豚肉及菠菜，每啖都好滿足。最想推介的是主菜韓川菜包五花腩，店家特別用小蠟燭火爐仔保持住腩肉的溫度，三大塊五花腩燒得勁香口，唔會太乾身仲有少少juicy的肉汁，可以事前向店員講定秘製魔鬼辣醬想要有幾辣，我覺得少少辣就夠，因為太辣會蓋過五花腩的肉香，然後按自己喜好口味配芥末醬、醬汁、洋蔥及蒜片，以生菜包住嚟食，好好味又唔會覺得油膩，而且兩個人食都幾飽肚，可見其份量都幾多。