XOXO Café Lab (Closed)

淘大真係好多好野食，呢間餐廳想試好耐喇😍，成日見到佢個抱抱窩飯都覺得好過癮咁。今日叫朋友晏晝去搵定位先，但估唔到點幾鐘都無咩人。去既過程我地仲兜右兜去錯左商場果邊。原來第三期係戲院果邊先啱。環境以tiffany blue同藍綠作主調，感覺幽雅得黎幾有格調，座位亦好寬闊舒適。夏日炎炎，真係要飲番杯凍野。叫左杯蜂蜜檸檬水果茶（$48)。呢個水果茶味道好清，唔會太甜同帶微酸，飲得出好清新既茉莉花香，個底仲有d 奇異果，火龍果，蘆薈，蘭香子，柚子肉等等，幾有咬口。韓國野其實我都好少食，因為怕辣。但朋友點左呢個鮮蚵仔泡菜蛋餅（$62),真係超好食！蛋餅用鐵pan 上熱辣辣，但個蛋好滑唔會過熟，估唔到蚵仔同泡菜又幾夾☺️d 泡菜微微辣連我都食到，入面仲有一條條蔥，真係好香啊！ 黑菌忌廉汁年糕都好好食。個汁真係一流，好正好濃郁，有菌香之餘仲有d蒜粒，個汁如果拎黎撈意粉就正。年糕本身都好少食嫌佢一凍就好硬，但薯粉粒真係好正，有小小咬口但凍左都唔會韌。👍🏻士林炸雞都唔錯，皮薄得黎唔油膩，點埋個蜜糖超正。最後係最期待既抱抱窩飯，㨂左鰻魚味。賣相就好吸引，但估唔到係最唔好食既一樣。咸味既梳乎厘感覺好奇怪唔多夾