吞POT 雞煲火鍋.住家菜

Open Now

Now Closed

趁天氣仲涼涼地，梗係要繼續打邊爐啦！雖然我其實係一年四季都會打邊爐😂😂一出𨋢就見到呢個好有氣勢嘅魚缸！入到去環境都唔錯，唔會好多人污煙漳氣咁，枱同枱之間有足夠空間，坐得夠舒服。坐窗口位，見到復活雞😂望出去見到旺角街景，幾好view!今次就揀咗滋補螺片花膠雞煲，因為半隻雞都係＄158 ,但係啲食材就好似好名貴好吸引咁，所以就忍唔住叫咗呢個！呢個煲絕對冇hea你，因為真係有好多花膠同螺片喺裏面，啲雞又好滑，個湯仲好濃味，同朋友忍唔住飲完一碗又一碗，差啲飲晒成煲！好彩佢加湯係加豬骨湯，唔驚冇湯打邊爐！講番啲火鍋料，我覺得全部都好新鮮，特別推介芝爆響鈴！佢啱啱炸起熱辣辣脆卜卜，最特別嘅係佢中間有芝士，第一次食，好正！餃同丸都好多有特色嘅選擇，我就叫咗個手打香煎鵝肝蝦丸同蟹粉蟹肉雲吞，全部都真材實料，真係有鵝肝同蟹粉，好味！啲肉都好新鮮，叫咗一個肥牛同埋牛柳粒，好有牛味，牛柳粒好有牛味有咬口同埋唔會韌，推介！食完咁多肉，當然要食返啲菜，呢個菜菜籃好多款菜都有，仲擺得好靚好似一扎花咁，好有心機。總括來講，好滿意呢度嘅食物同埋環境，有機會會再嚟食過。