羲和小館 (Closed)

趁住母親節，同阿媽喺東涌shopping完之後，就同全家喺附近食返個晚飯。 屋企人好鍾意食中菜所以我帶咗佢哋嚟食片皮鴨。因為想留肚食多啲其他嘢，片皮鴨淨係嗌咗半份，其實我覺得份量好多，四個人食已經啱啱好。 如果嗌一隻可能要六個到八個人食。 鴨有三個部位，我唔識分，總之好食啦。最緊要係個卷皮新鮮熱辣，夠香軟！ 跟住佢仲有得揀鴨肉兩食，我嗌咗薑蔥爆炒，啲鴨肉又係好入味！ 炒得好香好有鑊氣！跟住仲食咗個好抵食嘅薑蔥鮑魚雞煲，佢爆炒得好香，啲雞同埋啲鮑魚都好入味，平時食鮑魚多數都冇味，呢個勁好食！ 嚟到呢啲小館，梗係要叫返個小籠包。多汁皮薄係基本。呢度咁啱做緊個酸菜魚優惠，我屋企人平時唔食，但係我好鍾意食，個酸菜魚上到時我屋企人都話好香，佢個味道好平均，唔會太酸唔會太辣，我屋企人都話接受！跟住叫咗個櫻花蝦炒飯，正常發揮。 最後仲有個冰梅排骨，有少少拉絲，炸得好香脆，好好食。