樂天客棧 (Closed)

今日帶兩個姪仔去奧海城玩全球第一個嘅Running M&Ms，玩之前係商場搵嘢食，見到樂天客棧下午茶時段，炒麵飯有五折優惠，好吸引，係門口望吓餐牌，都啱晒兩個姪仔食，就係依度開餐，食咩就由兩個姪仔話事。最先離蒜香紅海蜇頭，係哥哥點嘅，點知食咗一啖，哥哥話好辣食唔到，禁唯有我地大人食啦，海蜇好爽，吸咗d蒜味濃嘅辣汁，我覺得好好食，不過如果細佬食又真係辣咗少少。招牌扣肉包，扣肉好入味，望落好似好肥噤，但食落又唔覺，好鬼惹味。樂天營三彩，細佬點嘅，點知細佬只係食又甜又爽嘅南瓜，其他無食，不過我就最鍾意蕃石榴，又香又有口感，蕃茄都好食，酸酸味味，好多汁。阿婆蕃茄炒蛋，哥哥話好想食，蕃茄酸酸甜甜，好開胃，雞蛋又香又滑，顏色又靚，送飯一流，叫咗個白飯比佢地，一陣就食清光。再叫多咗個家鄉海鮮炒麵線，麵線炒得好乾身，又唔會好油，材料有蝦，有魚，仲有魷魚，加埋d蔬菜，都幾好食，同埋下午茶有折，只係$44真係好抵食，唔好以為下午茶會比少d你，其實個份量一d都唔細，講真茶餐廳用依個價錢都未必食到啦，所以絕對超值。唔知兩個姪仔係未心急去玩，佢地好快將d嘢食清光，仲叫我快d埋單，真係比佢地激襯。