Burgeroom (Fashion Walk)

Open Now

Now Closed

上星期再次到訪Burgeroom。其實呢兩年都嚟食過三四次，基本上行到Fashion Walk又諗唔到食咩就會食Burgeroom，因為佢啲漢堡好足料！今次同男朋友叫咗兩個漢堡，一份升級做午市套餐，仲叫咗一份雞翼。唔好以為份量好少，我哋食完呢餐，夜晚飽到都唔係好食到飯！次次嚟到我都會食大烤菇芝士牛肉漢堡。隻菇好似一隻手掌咁大，烤完之後超多汁，夾埋芝士同牛肉一齊就唔會咁肥膩。 一如既往，塊漢堡排好厚身，不過一啲都唔乾，仲好有肉味。不過個包真係太足料，所以都幾難一啖咬到全部食材！男朋友叫咗菠蘿煙肉牛肉漢堡。呢個包個亮點係塊菠蘿！塊菠蘿微微燒過，所以個甜味幾出。甜甜酸酸嘅菠蘿同煙肉漢堡好夾，減低咗兩種肉配料嘅油膩感。我哋仲食咗蜜味辣雞翼！蜜糖同雞翼已經係好夾嘅食材，再加去微辣嘅調味，好滋味。就算食完個漢堡好飽，我哋都食得曬啲香脆雞翼！飲品方面，我哋叫咗Snapple嘅桃茶。以前讀大學成日都會喺飯堂買Snapple，而家都好少成會飲到。嘅個茶係少少甜甜酸酸，好開胃！相對其他漢堡包店，Burgeroom 係少啲花巧嘅菜式，不過亦證明佢真才實料，所以我哋先一再嚟食。