陳儀興尚潮樓 (英皇道)

Open Now

Now Closed

屋企人早幾日話想食潮州菜，我就記得我之前去過呢一間位於鰂魚涌嘅餐廳，叫「陳儀興尚潮樓」。今次再去同屋企人都覺得幾滿意。首先食左個鹹酸菜同埋飲咗啲功夫茶。一開始就上左兩個湯品同前菜，兩款都有唔同嘅特色。首先，我哋叫咗一個潮州名菜「護國菜」。其實我自己本身都唔知護國菜係咩，淨係見佢綠得好深色覺得佢幾特別！但飲落去佢嘅湯底鮮美濃郁，問返個店員原來先知道係用菠菜去整。我哋仲叫咗個鹹菜花蛤湯，個花蛤湯味道鮮甜，湯裡面嘅鹹菜同花蛤好夾仲加埋番茄，增添了湯品嘅層次感。就前菜方面，我叫咗一個海蜇頭。呢個海蜇頭真係好特別！佢有獨特嘅麻油香氣，令人食得好過癮。個口感超爽脆，同時又帶點清爽。正呀！到左主菜方面，我哋叫咗一份手工菜個名叫石榴蟹同埋乾瑤柱春菜煲。石榴蟹嘅製作方式非常精緻，蟹肉鮮嫩多汁，上菜仲整到好靚添。而乾瑤柱春菜煲嘅組合亦十分出色，瑤柱鮮香，春菜爽脆，湯底濃郁，入口滋味豐富。媽媽呢一餐都食得好滿意，我見到佢個餐單入邊仲有好多唔同嘅菜式，希望下次可以試吓其他嘢啦。