星記海鮮飯店 (一號廣場)

Open Now

Now Closed

朋友推薦我一訪位於中環擺花街嘅星記，最初唔知其特別之處，原來係連續七年榮獲米芝蓮必比登推介，失覺了。雖然星記係一間細小的中菜館，但店員服務殷勤，人情味滿滿，試咗佢哋推介嘅椒鹽大尾魷，馳名鳳梨生炒骨。由於午市套餐包埋老火湯，店員火速送上蓮藕湯，對於呢啲長期冇住家飯食嘅我，搵番家嘅感覺！先講講椒鹽大尾魷，有別於一般鮮魷，大尾魷價格偏高，質感彈牙，食得出係新鮮貨，聽店員講食材係每朝拎貨，再加上唔死鹹嘅椒鹽，薄薄的脆槳，真係好好味！另一道推介菜式馳名鳳梨生炒骨，粉槳唔厚身，個醬汁酸酸甜甜恰到好處，豬肉肥瘦適中，一啲都唔鞋！小棠菜炒上海年糕就正常啦！朋友叫咗欖菜肉鬆炒涼瓜，我唔好涼瓜都試咗啖，都可以接受呀！黑椒荷蘭豆龍鬚絲粉絲煲，惹味之餘，粉絲乾濕度適中。成餐飯以一碗紅棗雪耳糖水做結尾，住家菜感覺番曬嚟呢！