COBALT

Open Now

Now Closed

今日出咗兩個月花紅，當然要同太太慶祝兼獎勵吓自己啦！知道大角咀有間新開西餐廳，順便試試新口味。餐廳門面用咗我喜歡嘅藍色，入內有一列整齊嘅酒櫃亦係嗰隻藍色，設計簡潔，格外顯得高貴優雅。太太鍾意食雞肉，見餐牌上main course有一款係祖傳烤雞，一於試吓。上碟時香噴噴 ，趁熱食一流，表皮金黃香脆，雞肉本身可能用咗獨特醃料醃製，食落透出絲絲香草味，裏面嘅雞肉鮮嫩細緻，肉質軟滑多汁，兩人都覺得味道啱啱好，而且份量亦適中。我本人就喜歡香口炸物，紫菜椒鹽魷魚鬚就必定唔會錯過。薄薄炸漿，令外皮炸得好酥脆，入面嘅魷魚鬚就結實彈牙，配以紫菜加醬汁，一啖一口，極之香口惹味，太太亦食到津津有味。呢餐可謂相當滿意，日後定會約朋友再嚟chill吓，歎吓美酒，環境清静，相當一流。