富園海鮮酒家 (Closed)

都唔介意啲九十年代失修嘅裝修（可能曾經風光過）；都唔介意想搵個侍應甚艱難，差啲要自己拎埋張點心紙直接遞全場人數五隻手指有找嘅寫單侍應；都唔介意啲食具殘殘舊舊……但食肆最基本講求嘅「食」都搞成咁，真係折壽唔到囉。「炸魷魚鬚」脆漿唔脆都算，咬落去連細路都話食唔到魷魚味，本人咬落去都係得面頭啲蒜粉味，入面又唔係啲雙氧水乸過嘅水發魷魚，但居然係一啲味都冇，唔知係咩軟體物種。「蝦球湯伊麵」上鏡同真人差唔多，隔夜樣，好食度唔駛提。「雪山叉燒飽」同鬆化無緣。「燒鵝皇瀨粉」鵝好厚肥膏，碗瀨粉唔知係廚房冇加湯定預先𢳂定索哂湯。「胡麻醬茄子」胡麻醬有啲似丘x芝蔴醬，配以去咗皮一片慘白嘅烚茄子，叫做食得落口。以下點心叫做可以擺落口唔會媽媽聲：成間酒樓呈超長形似入咗山洞，傳菜姐多過寫單人，人手嚴重唔夠，除咗入座時有啲心機招呼吓之後，收點心紙疑似部長嘅男職員都唔多耐煩，真係對食嘅要求低到貼地、貪平又想飲中茶或者近自己住嗰座先會想嚟。