一起果醬 (Closed)

閨蜜相約見面聚一聚，佢俾咗條link過我，話呢間食過唔錯，咦...果醬...? 唔係食晚餐咩?地點都容易搵嘅，投注站右轉上少少斜就到，門口擺咗店家的自製果醬。叫咗兩個套餐加一個多士，套餐係沙律、餐湯+主菜+甜品，如果想飲嘢，可以半價加嘅。田園沙律配熱情果油醋汁材料新鮮，個汁好酸，雖然我鍾意熱情果香味，不過味道加埋醋實在太酸。磨菇湯幾好味，有菇粒粒。紅湯就普通，ok啦。慢煮法式羊架配芒果芥末汁鍾意食羊扒，無咩羶味，肉質軟腍，醬汁芥末味出啲，唔錯喎。慢煮極黑毛豬扒配肉桂蘋果汁豬扒肉味香濃有肉汁幾好唔錯，仲有新鮮車厘茄和露筍伴碟，啲餐具都幾精緻。跟餐甜品cheese cake面頭淋上果醬，又係一種不錯的風味。果醬九宮格多士，九宮格讓我想起小學時寫毛筆字的本子。厚麵包烘得外表香脆，內裡仍然軟熟，多士分成九分，所以叫做九宮格吧。每格各放一種自家果醬，總共九種果醬口味，唔記得啲名啦，不過幾過癮，又幾好味，還有果肉在內。