Gontran Cherrier (Bakery)

Open Now

Now Closed

去到Musea B2 就會比一股好香嘅味道吸引住。就係呢一間咁邪惡嘅麵包舖，每次經過都會流口水。佢哋嘅牛角包好香，好精緻。去到嘅時候已經大排長龍，有一個蛇餅。大概有2-30人排隊俾錢。揀咗一個蝴蝶酥，一袋方包，一個普通牛角包，一個煙肉芝士牛角包。跟住快快手手去排隊。咁啱呢個時候有新鮮麵包出爐。職員會推住一個扶手車，載着新鮮出爐嘅麵包，問吓排緊隊嘅人有冇興趣。結果我哋係冇自制能力咁買多兩個。買咗一個酥皮腸仔包，同埋一個蒜蓉牛油包。因為實在太香啦，根本忍唔住就被店員游說買多咗兩個。排隊都起碼要排10分鐘左右先至比到錢。諗住可能唔夠人手做嘢，但原來收銀嘅地方已經有三個職員收緊錢。一個負責計數同收錢，兩個負責將啲麵包入袋。實在太繁忙啦。因為有兩個麵包係新鮮出爐熱辣辣，所以唔可以糟蹋佢哋，就即場食。個酥皮腸仔包好好味。個酥皮非常之鬆脆，牛油味好重，熱辣辣，腸仔有大條。完全諗唔到可以點樣挑剔佢。個牛油蒜蓉包，外面係比較硬，好似法包咁，但係裏面真係好鬆軟。每一寸嘅麵包都吸收咗蒜蓉牛油。真係食到停唔到口。六樣嘢，總共係$190。平均大概30幾蚊一樣嘢。唔平，但真係好好味。值得回購。