炳記 (Closed)

一直都好想試炳記，原來就係細妹新居附近，終於可以有藉口來試下。細妹之前試過糯米雞，佢話麻麻地，所以今次預訂o左隻八寶鴨，好大隻，我o地6個人都食唔晒。饀料與蓮香有些出入，但份量十足，有五六個蛋黃、差不多有十粒栗子、蝦、叉燒等。味道雖然比蓮香較淡，但仍然好入味、鴨肉算嫩滑。豉汁燒鱔-鱔球肥美肉厚、爆得好又脆口，只可惜每人一件，真係唔多夠喉；豉汁好惹味，老豆同老公用來撈飯，佢o地話勁正。生炒骨-其實係咕嚕肉，整得幾有水準，肉質唔錯，件件炸得脆口，甜酸汁的味道及濃度兩者均適中。焗魚腸-做得麻麻，蛋幾實，雖然魚腸夠多唔算肥，不過一點香味都無，因為焗燶o左，食到底都係蛋焦，早知換過一碟。蒜茸白菜仔-炒得唔算太油，白菜幾嫩口。可惜人少試唔到其他菜色，下次有機會可以試試其他。