尚文潮州菜

Open Now

Now Closed

晚餐選擇了灣仔一間新開潮州菜，此店原來是由上環老字號尚興潮州菜老闆細仔經營，而大廚係前百樂廚師，質素有保證，尚文潮州菜走中高檔路線，有高檔嘅鮑參翅肚，亦有正宗潮州菜式，店員會了解客人喜好，唔會硬銷高價菜式，亦會介紹時令新鮮菜。店員推介點了幾個小菜大極素菜羹，口感滑溜，啖啖新鮮蔬菜嘅味道，卻係特別清新，問清楚原來主要係用蕃薯苗烹製，幾特別的確係好飲。九肚魚烙，蠔烙就食得多，九肚魚烙卻係第一次，滿滿嘅九肚魚肉加入蝦肉菜甫煎，煎得好香調味恰當，魚同蝦嘅鮮味同時突出，兩面煎得好脆。鹵水鵝肝鵝肉，鹵水好香濃鵝肉入晒味，鵝肝係粉肝，食落好滑又甘香，當然唔少得炸豆腐吸收鹵水汁夠晒嫩滑。潮州小炒王富有潮州風味，西芹、芹菜、椒絲、甘筍絲、菜甫、魷魚鬚、蝦乾、海蜇爆炒非常香口惹味，口感豐富。最後兩碗潮汕特色糖水，清心丸綠豆爽，其他地方的確好少有食到，好滑溜嘅薯粉，加入去皮綠豆，仲加入銀杏，清甜嘅糖水作為晚餐嘅完美句號。