熊小館

Open Now

Now Closed

呢日同大大細細去MegaBox行街，行行吓佢哋當然話肚餓，要食吓下午茶！於是我哋選擇咗呢間親子餐廳食個下午茶。呢間餐廳如其名，有好多熊熊公仔同擺設，細細一入到去就尖叫，攬住啲熊熊公仔，非常開心。餐廳又有個玩樂區，佢哋都入咗去玩，放下電，俾少少時間，我哋大人唞吓🤭玩夠先至開始食嘢。燒汁香蒜煙肉焗去骨雞腿飯連餐湯麵包去骨雞腿，啲肉多到好似雞扒咁，肉質嫩滑又入味，配埋煙肉同燒汁食，個飯又香又惹味。不得不提嗰餐湯同麵包，餐湯熱辣辣送來，非常香滑，飲完好暖胃。麵包焗得非常香脆，加埋香蒜醬焗，咬落脆卜卜，十分美味。金磚西多士呢個西多士令你食唔停口，炸得外脆內軟，而且好貼心咁切開一嚿嚿，味道又唔太甜，小朋友都食得，我哋一家都好鍾意食。