Video
Read full review
2012-04-27
98 views
XO一家最愛食日本嘢，家中大肥（即XO爸）同友人聚餐時，得悉銅鑼灣有間勁貴，不過超好食o既日本菜，所以襯中肥（XO哥）得閒，我地一家三肥就走左去見識下。竹壽司位於潮廈Cubus 內，小肥經透明玻璃電梯上樓時心情已經開始高漲。一出「車立」門，見到以竹為主o既裝修覺得好貼切之餘，視覺上亦顯得簡潔，走廊兩旁極似金色瀑布o既燈竹效果，高雅大方，尤其出色！Sushi counter看似平常，但係每個座位都好闊落，好難得我地三個不同高度同橫度o既大男人都坐得咁舒服！地下簡單o既腳踏位，不但令到最矮o既XO唔會吊腳，六呎高o既爸爸同哥哥亦有足夠位置伸展，圍住牆邊同腳踏位o既燈光喺昏暗o既環境更覺有用，燈光設計師真係有心思！入坐後送上一條熱毛巾，剛好比我抹走手上o既雨水，同暖下對手。早到o既爸爸已經同日藉壽司師傅君島-san傾得好開心，好明顯大肥未飲酒已經開始表演佢D日文啦；哈，點知聽真D，原來師傅D廣東重犀利！今次目的係黎試食，而且有老豆找數，所以我同哥哥就好豪地每人叫左個經理姐姐Joey介紹o既「おまかせ - 竹」（Omakase – Take，HK$ 1,500）set dinner。因為我地兩
竹壽司位於潮廈Cubus 內，小肥經透明玻璃電梯上樓時心情已經開始高漲。一出「車立」門，見到以竹為主o既裝修覺得好貼切之餘，視覺上亦顯得簡潔，走廊兩旁極似金色瀑布o既燈竹效果，高雅大方，尤其出色！Sushi counter看似平常，但係每個座位都好闊落，好難得我地三個不同高度同橫度o既大男人都坐得咁舒服！地下簡單o既腳踏位，不但令到最矮o既XO唔會吊腳，六呎高o既爸爸同哥哥亦有足夠位置伸展，圍住牆邊同腳踏位o既燈光喺昏暗o既環境更覺有用，燈光設計師真係有心思！
入坐後送上一條熱毛巾，剛好比我抹走手上o既雨水，同暖下對手。早到o既爸爸已經同日藉壽司師傅君島-san傾得好開心，好明顯大肥未飲酒已經開始表演佢D日文啦；哈，點知聽真D，原來師傅D廣東重犀利！
今次目的係黎試食，而且有老豆找數，所以我同哥哥就好豪地每人叫左個經理姐姐Joey介紹o既「おまかせ - 竹」（Omakase – Take，HK$ 1,500）set dinner。因為我地兩兄弟都怕骨，所以落單時同Joey講好刺身壽司同燒物要遠離鱔同其他多骨o既魚，好感激佢真係跟到足。為我地送上食物o既哥哥仔除左好耐心地同我地講解食材，爸爸特別滿意佢加酒o既速度。頭盤一之「小柱おろし和え」（帶子蘿蔔）：帶子蘿蔔依個配搭小肥未食過，味道清淡得黎好清新，幾特別。
頭盤二之蟹肉沙律：蟹肉鮮嫩，味道香甜，沙律醬內加左少少胡椒粉，個組合幾得意，正！
頭盤三之甜蝦配小白蝦：大蝦小蝦都係咁滑嘟嘟，同咁爽嫩。
刺身一之八爪魚：八爪魚片切得好夠薄，不過最精彩係佢超級爽脆o既口感！平時唔鍾意食八爪魚o既XO都想叫佢黎多碟，可想而知有幾掂！
刺身二之鰹魚：魚味濃郁，加埋蔥蒜同洋蔥絲一齊食，整體變得更加香脆，讚！
刺身三之中拖羅：肥嫩o既拖羅溶喺口，魚鮮味上埋鼻，嘩，無得頂呀！
刺身四及五之油甘魚與蝦：大大隻o既甜蝦鮮脆爽甜，油甘魚油份足，香滑無比，味道甜美！煮物之櫻花糯米卷金目鯛：粉紅色o既外觀同餸名都令人想起而家正正係櫻花季節，好有意思！櫻花糯米香腍軟熟，不過可能紫蘇葉個味道太濃所致，XO唔係好食得出卷內金目鯛碎o既味道。
燒物之鹿兒島和牛：三成熟o既和牛非常鬆軟，又夠肉汁，入口半溶嗰個感覺好high！只係當時心想：就算話係「少吃多滋味」，兩小件也實在太少了，真係唔係幾夠喉。
君島師傅所做o既壽司，全部都已經調哂味，所以唔需要再點任何醬油。味道同稻菊森口勇師傅嗰D極為相似，莫非兩位係師兄弟？！壽司一及二之金目鯛與平政：鮮甜爽滑魚油夠，齒頰留香！
壽司三之蜆：君島師傅話此款蜆壽司最啱時候食，因此特別推介。蜆肉鮮甜肥美，配上wasabi同甜醬，清香味道更覺強烈，師傅真係冇介紹錯！
壽司四及五之針魚與小肌：針魚同小肌個外表好接近，不過食落就知道口感同味道都非常不同。針魚肉質爽口，但小肌偏柔軟，而且後者魚鮮味比較濃。經師傅掃上調味，兩款都咁好食。壽司六之鮪魚：喺爽滑o既Maguro面放上芝麻粒，增添香脆，簡單o既心思令食客食出驚喜，妙哉妙哉！
壽司七之海膽：海膽份量絕不吝嗇，淨睇相都已經值滿分！海膽色澤光鮮，味道鮮甜，質感嫩滑，無得彈！
碎拖羅手卷：手卷最外層o既紫菜皮好似啱啱烘過黎咁，又暖又香脆。師傅喺軟熟o既壽司飯同拖羅碎餡中加用左黃色o既蘿蔔絲點綴，令魚味更加濃烈鮮甜之外，整個卷物由外至內都變得咁爽脆，好野！湯：海鮮味香濃，飲得出個湯係用真材實料肴製而成。雖然未別及得上中式老火湯咁有火口，不過餐廳肯選擇唔用粉去開個麵豉湯已經代表左好有誠意！
酸菜之薑及蘿蔔：爽口o既蘿蔔用柚子汁醃過，微酸得黎味道又清清甜甜，好醒胃。
甜品之柚子Sorbet：清香酸甜。
小肥食完成個「おまかせ - 竹」餐，雖然唔可以話重肚餓，但係好似差咁Ｄ嘢咁，估計如果佢上甜品前加多碗細細o既湯麵，應該會完滿好多。
君島師傅所握製o既刺身壽司非常精巧幼細，外型高貴，而且美味可口！如果大家好似家父咁，唔需要食熱嘢，大可選擇坐壽司吧，鍾意食邊款就叫邊款，更可以比師傅話事，包保你味蕾會有一級o既享受！日藉師傅友善體貼o既服務，同佢超勁o既廣東話一樣，真係令到三肥大吃一驚；最感動o既係我地走嗰陣時，君島師傅由壽司吧走出黎，送到我地去「車立」口，真係客氣！
Post
