頑石燒肉所 (Closed)

依間係西環嘅燒肉小店出名食牛舌，而且就算係和牛都係百零蚊位就食到，主打親民價錢有高質素肉類，今次同朋友午市到訪都坐咗8成滿🤣呢到嘅石燒牛提供好多唔同部位選擇，今次揀咗澳洲M9和牛牛肩脊里肉 ($188) 有五大片，片片都好肥美，燒完之後得別香💛 三款調味料入面最鍾意都係岩鹽～ 跟餐仲有日式玄米茶、麵豉湯同埋沙律🥗除咗可以石燒，佢哋仲可以轉日式關西風壽喜燒鍋 (+$38)，自己就揀咗澳洲M9和牛牛臀肉蓋 ($188)，比起肩脊里肉，自己更鍾意呢份，牛肉食落更加軟稔，而且牛味濃郁，加埋壽喜燒汁好夾，另外附送嘅配菜都好豐富，特別鍾意佢哋舊豆腐煎得好香，入面仲保持嫩滑🤍除咗基本嘅定食，呢到都有唔少小食選擇，吉列炸蠔 ($22)炸得幾香口，雞皮餃子($38)都幾有驚喜，一咬落去啲肉汁爆晒出嚟😳呢一間嘅環境都幾有日式小店vibe，上菜速度都快，整體嚟講幾好坐，其實佢哋餐牌仲有更多肉類選擇，有興趣嘅朋友可以留意一下～